José Luis Abalo / Fotografía con retorno / 6 – A muller estaba alí…, Xosé Enrique Acuña / Texto

0 comentários 🕔13:30, 17.Dez 2014

A muller estaba alí e os teléfonos móbiles xa chegaran. Aterraron nas nosas vidas por man dos que podían, despois por conta dos que os necesitaban e máis tarde colonizaron entre os que non puideron ou xa non quixeron escapar deles. Pillalos pola rúa, fotografalos, non era doado nos primeiros momentos. Eran cousa de coches con vocación representativa e de despachos nos que uns terminais aínda xigantescos se amosaban á vista dos visitantes co único e indisimulado ánimo de abraiar na clientela. Certo día adoptaron a autonomía e tamaño preciso para que pasearan polas cidades e non foron poucos os elixidos que con fachenda de novo rico percorrían paseos, avenidas e centros comerciais en pose de facer negocio. O conto era airear relacións privilexiadas, edificantes pelotazos, viaxes vertixinosas ou insinuar, case sempre en voz alta, o posible potencial económico do portador do aparato. Pasaron anos e tecnoloxías e o común dos mortais botou man e oído deses móbiles que chegan para enfiar as máis normais ou reservadas das conversas e para, sen piedade, asentar negativos apuntes na agre literatura das contas correntes. E o fotógrafo xa non foi quen de liscar deles. Aparecíanlle en calquera esquina para ser fonte de retrato ou documento. Mesmo logrou facer aparecer, como os antigos espiritistas, a muller coa que fala ou enreda un telefónico e anónimo paseante.

Sobre o autor / a autora

Sem comentários

Ainda não há comentários

Ninguém deixou um comentário para este post ainda!

ESCREVA UM COMENTÁRIO SOBRE ESTE POST

Escrever um comentário 

O seu endereço de email não será publicado. Campos obrigatórios são marcados *