Entre as sombras e a luz

Entre as sombras e a luz

0 comentários 🕔12:30, 08.Ago 2016

Poemas dedicados a Rosalía de Castro.

Entre as sombras e a luz
escoito o seu silencio…
Del veñen a min, como un nacente, versos e palabras.
Entre as sombras e a luz deste quero e non quero amencer,
ela máis eu conversamos…
Envoltas nun remuíño de primavera e follas.
Xílgaros polo azul
sobrevoándonos.

*

De redor de ti, na máis profunda escuridade
persiste toda a luz resplandecente
da nosa máis xenuína flor.
A flor do toxo, acendendo silencios, sempre estivo en nós.
Sol preso das espiñas, luminaria das almas,
compañeira nos camiños, bágoa que choraron as estrelas,
zapatiño de anxo. Grilanda das nosas vellas fadas.

*

Soñaba…
E a lúa, a túa cometa, na man levabas.
Prendida cun sutil fío.

*

Esta música interior que sinto,
mesturada co lóstrego e a calma.
Co pulo da danzar cos pensamentos
venme de ti.

*

O arco da vella tende unha ponte irisada na tarde,
curva de luz que sostén todo o peso do ceo;
mentres ledo rola polas nubes, o trebón de estío, con risos de lampo.
A terra bebe choivas de ámbar que a fecundan.
Xa están de volta a rosa e a azucena.
O mirto e o loureiro reverdecen; reafirman a súa inmortalidade.
A tarde fica inmóbil, sostida na áurea sonoridade do solpor, dun asubío…
Sinto que a eternidade está en ti.
E neste instante.

*

Quizais existes sombra nun mar cheo de estrelas.
E te achegues a min, con pasos silandeiros
dende o furtivo son dun acento perdido…
Nese vagar constante que te eterniza ao tempo.
Se cadra existes no discorrer das augas
que as fontes polos claustros verten lúcida e pura.
Conversas de rumoroso son
onde apagan a sede brancas pombas e rulas.
Quizais existes, espírito das formas,
dentro de todos nós, cal vaguidade núa.

Sobre o autor / a autora

Chelo Suárez

Chelo Suárez

O mellor don con que fun bendicida ao nacer foi cunha sede infinita de libros. O gusto por respiralos e lelos, tan pronto aprendín a ler. Poeta e narradora, dedícome a crear universos que conxugan o realismo e a maxia.

Sem comentários

Ainda não há comentários

Ninguém deixou um comentário para este post ainda!

ESCREVA UM COMENTÁRIO SOBRE ESTE POST

Escrever um comentário 

O seu endereço de email não será publicado. Campos obrigatórios são marcados *