3 sonetos de <em>Adagio por Outono</em>, de Modesto Fraga

3 sonetos de Adagio por Outono, de Modesto Fraga

0 comentários 🕔10:30, 05.Set 2016

Recentemente foi publicado por Alvarellos Editora o livro Adagio por Outono“, de Modesto Fraga, que obtivera o primeiro prémio do XLI Certame Literario Concello de Vilalba no 2015.

Agradecemos enormemente ao seu autor a escolha destes três sonetos para serem publicados na Revista Palavra Comum.

*

COA RAZÓN DOS SENTIDOS

Podo ver nos teus ollos o reflexo
dos días de caricias e tenrura
a ollada adolescente que é frescura
a tórrida paixón, cada latexo.

Podo sentir e oír máis do que vexo
tocándote en silencio, con dozura,
bicándonos os dous na noite escura
nun mar de sensacións e de desexo.

Podo ver e sentir. Tamén tocarte
nesta luxuria alegre e silenciosa
que a vida nos ofrece por instantes.

Podo pousar a lingua e degustarte
saboreando a flor máis deliciosa
que emana do perfume dos amantes.

*

DA AUSENCIA (E DE NÓS)

Non deixes de soñar por máis que a vida
te leve a algúns lugares sen retorno,
que o teu alento sexa vigoroso
e o tránsito emprendido escuma fértil.

Non permitas que a ausencia, con sixilo
intente seducirte e acaso sexa
a aurora boreal quen te sorprenda
coa humidade de todos os eclipses.

Non deixes de soñar. Nin tan sequera
de devorar a terra cos teus ollos
que son luz e crisálida, caricia

á que nunca me entrego pero adoro;
á que regreso ás veces mentres vivo
na que me perdo sempre que te soño.

*

TI + EU: NÓS

Aquela luz de outubro clandestina
leva forxada en nós desde as orixes,
buscámola na ausencia das vertixes
a carón dos silencios, na retina.

Eu digo que na ardora adamantina
habita a esencia, a apócema que elixes,
a luz á que has volver sen que te fixes
acesa, ou apagada, que ilumina.

Acesa ou apagada a luz, eu digo
quero volver sentirte, acaso quero
mil noites existir, mil veces sós.

En medio desa luz quero e reitero
ollar contigo o mar, sempre contigo
ser simplemente ti máis eu, ser nós.

*

Modesto Fraga Adagio-por-outono-capa-alvarellos-editora 300

Sem comentários

Ainda não há comentários

Ninguém deixou um comentário para este post ainda!

ESCREVA UM COMENTÁRIO SOBRE ESTE POST

Escrever um comentário 

O seu endereço de email não será publicado. Campos obrigatórios são marcados *