Entre as sombras e a luz (conversa con Rosalía)

Entre as sombras e a luz (conversa con Rosalía)

0 comentários 🕔09:35, 02.Jan 2017

Escoito os teus silencios…
Deles veñen a min,
como un nacente,
palabras e versos
que en ti dormen.

aaa *

Entre as sombras e a luz
deste quero e non quero amencer, conversamos.
Envoltas nun remuíño de primavera e follas.

Xílgaros polo azul
sobrevoándonos.

*

Hoxe acode a min a túa voz.
Que, remontando tempos e silencios,
vén elevarme,
con ás sonoras
de piano e luz.

*

Mirando dende a fiestra a Vía Láctea
sei que a noite é un silencio pleno.
Un sorriso de leite derramado
nun mar de abellas de ouro.
De redor, como un abano, a noite ábrese.
E, sobre min, en escamas,
chove música e luz.

*

A música interior que eu sinto
mesturada co lóstrego e a calma,
co pulo de danzar co pensamento,
venme de ti.

*

Quizais existes, sombra, nun mar cheo de estrelas
nese vagar constante que te eterniza ao tempo.
Se cadra existes no discorrer da auga
que as fontes polos claustros verten lúcida e pura.
Conversas de rumoroso son, onde apagan a sede
brancas pombas e rulas.
Quizais existes, espírito das formas,
dentro de todos nós, cal vaguidade núa.

Logo,
un lóstrego nas pálpebras veu espertarme
deste inconcluso soño…
E unha ansia de ti, de te ir buscar
nas pechadas estancias
do pazo máis deserto.

Sobre o autor / a autora

Chelo Suárez

Chelo Suárez

O mellor don con que fun bendicida ao nacer foi cunha sede infinita de libros. O gusto por respiralos e lelos, tan pronto aprendín a ler. Poeta e narradora, dedícome a crear universos que conxugan o realismo e a maxia.

Sem comentários

Ainda não há comentários

Ninguém deixou um comentário para este post ainda!

ESCREVA UM COMENTÁRIO SOBRE ESTE POST

Escrever um comentário 

O seu endereço de email não será publicado. Campos obrigatórios são marcados *