Poemas do libro inédito <em>Entre as sombras e a luz</em>

Poemas do libro inédito Entre as sombras e a luz

0 comentários 🕔10:00, 27.Fev 2017

Poemas do libro inédito Entre as sombras e a luz, como sentida homenaxe a Rosalía de Castro.

***

Agárdame.
Un día irei a ti.
Cando agromen as violetas sementadas no teu peito,
e de novo
escoitemos o teu canto.

*

Que misterio me une a ti,
que misterio.
No silencio, na palabra; sombra.
E na luz.
Que misterio…

*

A primeira e última andoriña daquel verán
deixaron sinal en ti.
Aínda es seu niño.

*

Veño pensar en ti,
nos límites dun novo paraíso
rescatado á malicia da serpe.
Veño buscarte no labirinto deste edén
onde é símbolo a mazá,
que preserva a frescura e a inocencia.

Veño pensarte nos límites dun tempo
que non se mide por distancias.
Veño sentirte, aquí, en Padrón,
no dourado solpor desta invernía
mentres canta o teu nome un reiseñor
por entre frondes malvas.

*

Nos acenos da pomba e da azucena, descífrote.
Na liberdade dos paxaros.
No zunido do vento, que se goberna só.
Descífrote na choiva, nos pinos e nas ondas.
Nos símbolos miniados dun libro de oracións…
No loureiro e na rosa, síntote,
Na cereal beleza da flor entre os trigais.
A clave en luz sonora desvélanma os teus versos.
E ti, que es constancia
no meu mundo interior.

*

Ti.
Es enigma
de néboa
e máis de lúa,
anainada nun son
de choiva e de campás.
Nos altares do tempo
es saudade
transida tan só
de saudade.

*

En Padrón, na súa alcoba, unha invisible man acariciou a rosa
que descansa no seu leito.
Pulsou a lira do silencio, e interpretou
unha sentida melodía.
E o cuarto iluminouse cun vivo resplandor.
Nese momento, nos recantos escuros,
acusouse o relevo dunha sombra.
E a luz revelou naquel espazo
unha nova dimensión…

Sobre o autor / a autora

Chelo Suárez

Chelo Suárez

O mellor don con que fun bendicida ao nacer foi cunha sede infinita de libros. O gusto por respiralos e lelos, tan pronto aprendín a ler. Poeta e narradora, dedícome a crear universos que conxugan o realismo e a maxia.

Sem comentários

Ainda não há comentários

Ninguém deixou um comentário para este post ainda!

ESCREVA UM COMENTÁRIO SOBRE ESTE POST

Escrever um comentário 

O seu endereço de email não será publicado. Campos obrigatórios são marcados *