Perante a Praia de Riazor (A Corunha, Galiza) –pois os ventanais deixaban ver a paisaxe a mediodía– emprázase a banda Freedonia ás 12:30 da mañá no Playa Club. Si, a esas horas tamén se poden escoitar e ver concertos. Todo é posíbel como se de Nova York se tratase, como en Brooklyn, como nalgunha praia urbana desa cidade tamén rodeada de mar.
Os instrumentos de vento foron os protagonistas así como a voz da muller negra que preside a banda. A liberdade tamén se canta a berros de “freedom”, liberdade para a humanidade e os pobos que a compoñen nunha sociedade ideal na que conxugar o individual e o social de forma harmónica. Nunha harmonía penetrada polo canto, polos cánticos nun inventado estado primitivo, época de crucial transcendencia pola existencia de igualdade entre persoas e así mesmo pola existencia dunha solidariedade sui generis. Ese estado que se recolle na escoita, no visual pola posta en escena na que os músicos se enfrontan ao descoñecido en cada actuación e no que o público vive esa mesma improvisación ante o que vai ser sen sabelo.
“Brothers and sisters”, homes e mulleres que se irmandan nun acto case epifánico. Unha especie de liturxia que é a música en directo. Procedente de África, a cantante diríxese a unha certa comuñón entre homes e mulleres que deben vivir con respecto mutuo e coa convicción de ser, de deber ser parte diferenciada e igual dun todo que é a humanidade. E isto en forma de jazz e soul para dar conta ademais do carácter místico deste estilo que xorde en último termo dese mencionado continente. Si, música negra con compoñentes brancos que sen dúbida beben das raíces máis ancestrais sen deixar de ser contemporánea.
Se nos perdemos pola urbe de Nova York con certeza atopariamos un concerto destas características.
Foto: Cf. Festival Noroeste – Estrella Galicia 2016
You might also like
More from Crónicas
XIIº Encontro de Escritores de Língua Portuguesa
Entre os dias 5 e 8 de setembro tive a honra de representar a Galiza em Cabo Verde no XIIº …
Primeira Crónica desde Xai Xai: a chegada
Participação de poetas da Galiza no VII Festival Internacional de Poesia de Xai-Xai, Gaza, Moçambique Primeira Crónica desde Xai Xai: a …
