Estes tres poemas inéditos pertencen ao ciclo do libro Espiral de sombras.
DUNHA ZAFRA IMPOSIBLE
A Alfredo Ferreiro
Dálle ao ferreiro un fol para que cante.
Dálle un labio loador e un merlo de auga.
Unha trencha durmida e unha arroba de sal.
Dálle unha fragua oculta nas vésporas do sangue.
Dálle fanal e draga, dálle funil e favo.
Dálle escuma invisible nas gabias da mañá.
Dálle un designio escuro
para que abra o camiño da esperanza
e asente ferro vivo nas entrañas do mal.
Que ardan as citanias nas estrelas.
Que a hedra palpite na lingua substancial.
Que arrase a cicatriz meigos e cans.
Dálle, dálle ao ferreiro
mantel, trinchante e pan.
*
NINGUÉN CHE DARÁ TANTO
A Ramiro Torres
O que che dea a cinza non cho dará o cabalo.
O que che dea o cabalo non cho dará o alacrán.
O que o alacrán che outorgue non cho dará o gabián.
O que o gabián che diga non o oirá o lagar.
O que o lagar fermente non ten por qué cuspir sobre a borralla.
A borralla non ten por qué dar contas do machado.
Mais tampouco o machado poderá darche nada
que non che dea a risa pútrida do lagar,
que a cinza non arrastre no cabalo,
que o cabalo non moia no alacrán,
que o alacrán non encince no gabián,
que o gabián non chante na túa lingua abrasada.
*
REPARACIÓN DO HIME
Non aborrezas os pelos do pene do cervo
porque deles virá
fecundidade á terra.
Non rexeites o cuspe na lingua da cervela
porque dela virá
lentura ao ermo.
Foxe de esmagar nunca
un humilde vilano,
un tímido cempés.
Canta o alento do lagarto
e o tímpano do merlo.
Toda xema de luz traerá promesas
aos valados de pedra.
Deixa o romeu cantar baixo o lintel.
Vén a xeira de erguer un fogar para os teus
no tempo da inclemencia.
Regálalle á torcaza os ouricelos
da Torre de Hércules
agora que o solsticio vernal ergue no ceo
harpas de liño e tálamos de estrelas.
You might also like
More from Poesia
Primeira Crónica desde Xai Xai: a chegada
Participação de poetas da Galiza no VII Festival Internacional de Poesia de Xai-Xai, Gaza, Moçambique Primeira Crónica desde Xai Xai: a …
Carla Nepomuceno entrevista Adrienne Savazoni | Café com Português
O «Café com Português» e a Palavra Comum trazem uma entrevista com a professora, ambientalista, promotora cultural e poeta brasileira …
